| Главная » Файлы » "Табасарандин нурар" | [ Добавить материал ] |
Генерал-майор Мурадов ихь республикайиъ
| 26.02.2013, 22:09 | |
Закур Урусатдин Федерацияйиъ Ватан
уьбхрурин Йигъ къайд апIуру. Думу машквар, Урусатдиъси, Белоруссияйиъ,
Украинайиъ, Киргизияйиъ, Приднестровьейиъ къайд апIура. СССР
гъарабгъхъан тина думу машквар СНГ-йин бязи уьлкйириътIан къайд
апIурадар. Урусатдиъ думу йигъ машкварси къайд апIувал давам шули ами.
Машквран улихьна ихь республикайиз табасаранжви, генерал-майор,
Забайкальейиъ ерлешмиш дубхьнайи мотострелковый бригадайин командир
Рустам Мурадов хялижв гъахьну. Думу Дербент райондин Чинар гъулан агьали
ву. 1973-пи йисан 21-пи мартдиъ бабкан гъахьну. Генерал Р.Мурадов
«Жилирвалин» кьюб ордендиз лайикьлу духьна. Дугъаз сабпи орден 1996-пи
йисан, Чечен Республикайиъ дяви гъябгъюрайиган, Заан Центарой шагьур
гъадабгъбаз лигну тувну. Думуган жигьил лейтенант Рустам Мурадов
Буйнагъскдиъ айи 136-пи дявдин бригадайин разведротайин командирди
гъахьну. Владимир Шамановдин буйругъниинди Датойиъ айи Масхадовдин
штабдихъди гъахурайи гъати йивбариъ Мурадовдиз зиян шулу. Думуган
Шалийиъ айи бригадайин командир, полковник Мурадовдиз «Жилирвалин»
кьюбпи орден тувну. 2009-пи йисан Мурадов Забайкальейиъ айи Ригъ
гьудубчIвру терефнан дявдин округдин 29-пи уьмуми кьушмарин армияйин
командирди тяйин апIуру. Гьадму йисан кIули гъушу дявдин бригадйирин
тактикайин ученйириъ, Онон ниркан ктучIвруган, Цугал полигондин командир
Рустам Мурадовди дирбаш,вал улупну. 2010-пи йисан гъахьи «Восток –
2010» гьяракатнанна стратегияйин ученйириъ дугъан бригадайи, Онон ниркан
кудучIвну, «душмандин» мотострелковый шубуб батальон ва танкарин кьюб
рота дагъитмиш гъапIну. Шубуд йисандин арайиъ Р.Мурадовди дявдин фициб вушра вазифа тамам апIуз удукьру бригада тешкил гъапIну. Гъи дугъан асас фикир, гьюкмин ерли органарихъди ва кьувватнан гъурулушарин дестйирихъди сатIиди ляхин гъабхури, эскрарин дявдин аьгъюваларин дережа ва гьарсар офицерин жавабдарвал за апIбиина жалб дапIна. Забайкальейин крайиъ дугъан бригадайин улупбар варитIан заандарси гьисаб апIура. РФ-йин Яракьлу Кьувватарин полковник Энвер Мусаевди генерал Р.Мурадов республикайиз дуфнайиваликан Мягьячгъалайин мэр Сяид Амировдиз хабар тувубси, генерализ шагьрин администрацияйиз теклиф гъапIну. Сяид Амировди, «ялавлу йишвариъ» иштирак духьну, генерал-майор званиейиз лайикьлу гъахьи урусатдин офицер тебрик апIури, думу ихь республикайин дамагъ ва жигьилариз чешне вуйиб къайд гъапIну. Жигьил генерализ хъана заан дережайин званйириз лайикьлу хьуб ккун гъапIну. Ихь ватанагьли Рустам Мурадов, генерал-майор звание тувбахъди тебрик апIури, дугъаз Ватан уьбхбаъ ва ватанпервервалин тербия тувбаъ гележегдиъра заан хъуркьувалар хьуб ккун апIурхьа. | |
| Просмотров: 1038 | Загрузок: 0 | | |
| Всего комментариев: 0 | |